Meqenëse pushuam bukur gjatë verës, është koha për t’u marrë me detyrat e vjeshtës. Për ne, banorët e papafingos, këto detyra mund të jenë më serioze se banorët që jetojnë në kate të tjera, por nuk janë të pamundura, sidomos nëse organizohemi në kohë për realizimin e tyre.
Kemi përgatitur disa këshilla të dobishme për ju në lidhje me të gjitha detyrat prioritare me të cilat përballen pronarët e papafingove. Padyshim që aplikimi i tyre do të zvogëlojë rrezikun e shpenzimeve të papritura gjatë ditëve të ftohta të stinës së vjeshtës dhe dimrit dhe do t’ju lejojë të kënaqeni në komoditetin e shtëpisë tuaj, pavarësisht nga kushtet e motit.
Pastroni elementët ngrohëse për të përgatitur papafingon
Papafingoja ofron shumë mundësi për ngrohje të lehtë dhe ekonomike në muajt e ftohtë. Pavarësisht nëse vendosni të ngrohni shtëpinë tuaj me kondicionerë, parno ose oxhak, duhet të siguroheni që elementët e ngrohjes të jenë pastruar mirë.
Sa i përket radiatorëve, të cilët më së shumti hasen nëpër shtëpi, para fillimit të sezonit të ngrohjes kontrolloni valvulat e radiatorëve sepse mund të rrjedhë uji. Më pas hiqni pluhurin nga pjesa e brendshme e radiatorit me një furçë të rrumbullakët ose një leckë të lagur.
Kondicionerët pastrohen duke hequr filtrin dhe duke hequr pluhurin dhe grimcat e dëmshme me ujë ose detergjent.
Oxhaku është më i vështiri për t’u pastruar dhe zakonisht kërkon më shumë kohë, pasi procesi përfshin pastrimin e oxhakut paraprakisht. Ju këshillojmë që të konsultoheni me ekspertë të kësaj teme, sepse si e tillë është mjaft serioze dhe pasojat mund të jenë shumë të dëmshme nëse nuk trajtohen në mënyrën e duhur.
Kontrolloni çatinë dhe sistemin e rrjedhjes
Pavarësisht se a jetoni në një shtëpi me papafingo ose në një apartament në papafingo, rekomandohet që sapo të vijë vjeshta e hershme, të përgatisni shtëpinë tuaj për kushte më të rënda të motit. Filloni nga çatia. Problemet me rrjedhjet e mundshme të çatisë mund të parandalohen me inspektim të kujdesshëm dhe zëvendësim të qeremideve. Shumë shpesh, sistemi i rrjedhjes së çatisë bllokohet nga gjethet ose objektet e rënë dhe pluhuri i bartur nga era.
Gjatë ditëve të ftohta, ulluqet ngrijnë ose pëlcasin, banorët e papafingos janë të parët që vuajnë nga këto probleme. Kjo është arsyeja pse ne ju këshillojmë të kontrolloni ulluqet tuaja. Nëse nuk jeni të sigurt se mund ta përballoni vetë riparimin, kërkoni shërbimet e një profesionisti për një diagnozë dhe riparim të shpejtë dhe të plotë.
Zëvendësoni dritaret e vjetra me të reja
Në vjeshtë, ajri i ftohtë hyn në dhoma direkt përmes dritareve dhe dyerve, natyrisht, me kusht që ato të mos jenë të mbyllura mirë. Për izolim shtesë, mund të përdorni një film transparent, por kjo është vetëm një zgjidhje e përkohshme, e cila shpesh nuk çon në rezultate efektive. Për të mbajtur ngrohtësinë në papafingo dhe për të ulur kostot e energjisë elektrike në ditët e ftohta, zëvendësoni dritaret e vjetra me të reja.
Dritaret ofrojnë efikasitet energjetik dhe mbajnë një temperaturë të këndshme në papafingo. Materialet cilësore të përdorura në prodhim garantojnë qëndrueshmëri në të gjitha kushtet e motit, izolimi shtesë i dritareve ruan nxehtësinë dhe rrit efikasitetin e energjisë në papafingo. Instalimi i xhamave siguron më shumë dritë dhe më shumë dritë dielli në dhoma, gjë që ngroh në mënyrë natyrale shtëpinë gjatë ditëve të ftohta të vjeshtës dhe dimrit.
Kujdesuni të mbani temperaturën optimale në shtëpi
Në fund të verës temperaturat jashtë janë ende të larta, klima në papafingo është e këndshme. Por, sapo vijnë ditët e ftohta të vjeshtës, është gjithnjë e më e vështirë ngrohja e dhomave nën çati, veçanërisht nëse nuk ka termoizolim të mirë.
Një papafingo me izolim të pamjaftueshëm humb pjesën më të madhe të energjisë së vet përmes çatisë. Prandaj, pa dyshim, një nga mënyrat më efektive për të rregulluar nxehtësinë në papafingo është instalimi i izolimit.
Materialet izoluese natyrale si leshi mineral me teknologjinë Ecose® ofrojnë njëkohësisht izolim të shkëlqyer termik, cilësi më të mirë të ajrit dhe mbrojtje nga zjarri. Përveç kësaj, është shumë e rëndësishme të zgjidhni materialin e duhur izolues që përputhet me strukturën specifike të çatisë, sepse kjo do të kontribuojë në ruajtjen edhe më të mirë të nxehtësisë në dhoma dhe do të reduktojë ndjeshëm kostot e ngrohjes në muajt e ftohtë.
Lulet mbajini jashtë hapësirës së hapur
Vjeshta është padyshim stina më e bukur, pasi natyra ndryshon tërësisht pamjen e saj dhe sjell ngjyra dhe romancë në qiellin ndonjëherë gri të vjeshtës. Sado që ne e duam një terracë plot me lule shumëngjyrëshe, temperaturat në fillim të vjeshtës, duke qenë se ato ndryshojnë, mund të rrezikojnë lulet dhe madje të çojnë edhe në ngrirje. Prandaj, është mirë që të hiqni bimët nga jashtë dhe t’i mbani ose në një terracë me xham ose në apartament.
Për të mos u marrë me të gjitha aktivitetet që lidhen me përgatitjen vjeshtore të papafingos në momentin e fundit, filloni tani me ndarjen e detyrave. Në këtë mënyrë ju do të siguroni ngrohtësi, kënaqësi dhe rehati në papafingo edhe në ditët më të ftohta të vjeshtës dhe dimrit.
